Timo Aitaka Liverpool Apiga Chini Ofa ya Bayern

Timo Werner ametangaza kuwa anapendelea kuhamia kwenye ligi nyingine baada ya kuthibitisha kuwa hana nia ya kujiunga na Bayern Munich.

Ripoti nchini Ujerumani wiki hii zilidai nyota huyo wa RB Leipzig alikuwa ameamua kupiga chini ofa Bayern, akisisitiza ni bora kuhama Bundesliga na kutua klabu nyingine kuliko kubakia Ligi hiyo hiyo na kujiunga na klabu tofauti.

Werner, ambaye ameripotiwa kupokea ofa kutoka Chelsea na Manchester United, ana kifungu cha uhamisho kwenye Mkataba wake cha pauni milioni 50 na anapendelea kujiunga na Liverpool kwenye dirisha linalofuata la uhamisho. Werner alisema: “Changamoto kwenye ligi ya nje ingenivutia badala ya kuhamia Bayern.”

Chelsea na United pia wanamsaka mshambuliaji huyo, lakini wanajua kuwa Liverpool ndio wanaongoza mbio hizo za kuwania saini yake. Werner amejidhihirisha kama mmoja wa Washambuliaji hatari zaidi barani Ulaya, akiwa na magoli 27 katika mashindano yote kwa klabu yake ya Leipzig msimu huu.