Conte: Inter Wamestahili Kufuzu Robo Fainali

Meneja wa Inter Milan, Antonio Conte anasisitiza kuwa Inter walistahili kwa sifa zote kabisa  katika robo fainali ya Coppa Italia na walikuwa na nafasi ya kuwachapa Fiorentina katika mda wa kawaida wa mchezo Jumatano.

Hata hivyo, Inter walihitaji hadi dakika 118 ambapo Romelu Lukaku aliwatoa kimasomaso kwa goli la kichwa na la ushindi katika mda huo wa nyongeza baada ya penati ya Arturo Vidal na mkwaju wa Christian Kouame kumaliza dakika 90 kwa sare ya 1-1.

“Tulistahili kufuzu, na ilitakiwa kuwa ndani ya dakika 90 za awali, kwa sababu tulikuwa na nafasi kubwa ya kushinda. Vijana walifanya vyema, kucheza dakika 120 wakiwa vyema na kujipanga kwa usawa. Nimeridhika.” – Antonio Conte

Zaidi Conte anabainisha kuwa amefurahi wachezaji wale ambao walikosa nafasi ya kutinga dimbani kwa mda mrefu kidogo kwa sababu tofauti kama Aleksandar Kolarov na Andrea Ranocchia walivyothibitisha ni kwa namna gani wanaijali Inter.

Conte anaamini kuwa alikuwa na kikosi bora zaidi kufuatia uchaguzi alioufanya, na kilistahili kupata matokeo mazuri na kufanikiwa.