Matokeo ya Mechi za La Liga

La Liga iliendelea wikiendi na mechi kadhaa zilikuwa kama hivi hapa chini:

Real Madrid v Eibar

Real Madrid wameshinda 3-1 dhidi ya Eiber katika mechi iliyochezwa kwenye dimba la Alfredo di Stefano. Hii ni mechi ya kwanza kwa ya kimashindano kwa Real Madrid baada ya ligi kuwa ilisimamishwa kwa miezi takribani mitatu kwa sababu ya janga la Covid-19.

Goli la kwanza la Madrid lilifungwa na Toni Kroos mnamo dakika ya nne tu ya mchezo kabla nahodha Sergio Ramos hajafanya hivyo dakika 26 baadae. Goli la tatu liliwekwa kimiani na  Marcelo katika dakika ya 37 ya mchezo.

Eiber walipata goli la kufutia machozi kupitia kwa mchezaji wao nyota Pedro Bigas baada ya kumalizia shuti la mshambuliaji Segi Enrich liligonga mwamba.

Ushindi huo kwa Real Madrid unaifanya timu hiyo kusalia nafasi ya pili ya msimamo wa La Liga na alama zao 59 baada ya kuwa wamecheza michezo 28 mpaka sasa, alama mbili nyuma ya Barcelona wanaaongoza msimamo wa ligi hiyo.

Atletico Madrid v Athletic Bilbao

Mchezo huu uliisha kwa sare ya kufungana 1-1. Kwa matokeo hayo Atletico Madrid wanasalia katika nafasi ya sita ya msimamo.

Goli la Atletico Madrid lilifungwa na Diego Costa, na kuwa goli la kwanza kwa nyota huyo kwa mwaka huu. Diego Costa alilitoa goli hilo kama zawadi kwa mchezaji wa timu ya wanawake ya Atletico Madrid, Virginia Torrecilla, baada ya midfielder huyo kufanyiwa upasuaji wa kuondoa uvimbe katika ubongo mnamo mwezi May.

Athletic Bilbao walikuwa wa kwanza kupata goli kupitia kwa nahodha wao Iker Muniain katika dakika ya 37 ya mchezo kabla Diego Costa hajasawazisha dakika mbili tu baadae.

Real Sociedad v Osasuna

Sare ya 1-1 ndiyo matokeo ya mchezo huu.

Kwa matokeo hayo, Real Sociedad wanasalia nafasi ya nne ya msimamo wa La Liga wakiwa na alama 47, alama moja zaidi ya Getafe wanaoshikilia nafasi ya tano. Huku Osasuna wakiwa nafasi ya 11 ya msimamo na alama zao 35.

Goli la Real Sociedad lilifungwa na Mikel Oyarzabal huku lile la Osasuna likiwekwa kimiani na Adrian Lopez kwa mkwaju wa penati.