Mkataba: Mazungumzo ya Depay na Lyon

Mchezaji Memphis Depay na klabu yake ya soka ya Olympique Lyonnais wapo katika muendelezo wa mazungumzo ya kumfanya Mholanzi huyo aongeze mkataba klabuni kwake.

Rais wa klabu hiyo ya ligi kuu ya nchini Ufaransa, Jean-Michel Aulas ameyasema hayo.

Depay alipewa kitambaa cha unahodha kutoka kwa kocha Rudi Garcia kufuatia kuondoka kwa Sylvinho mapema wakati wa msimu wa mwaka 2019-20 na amefunga jumla ya magoli nane kwenye ligi akiwa amecheza mechi 13 pekee kabla hajakumbana na majeraha ya goti kwenye mechi waliyokula kichapo cha 1-0 walipokutana na Rennes mwezi Desemba mwaka jana.

Mchezaji huyo wa zamani wa klabu ya PSV Eindhoven ambaye amekuwa na klabu ya Lyon tangu alipotokea kwa Mashetani Wekundu, Manchester United mwezi Januari mwaka 2017, amesaliwa na mwaka mmoja pekee katika mkataba wake wa sasa dimbani Groupama, lakini OL wanataka waendelee kuwa naye kwa muda mrefu zaidi.

“Lengo lake lilikuwa ni kucheza EURO, ambayo imeahirishwa kwa sasa,| alisema hayo Aulas. Alitaka sana kucheza kwenye hatua ya 16 bora ya michuano ya Champions League katika mechi za pili dhidi ya klabu ya soka ya Italia, Juventus, ambayo ilihairishwa pia pamoja na ile ya fainali ya Coupe de la Ligue BKT. Anajiandaa kuwa tayari kwa hilo.

“Siku zote nimekuwa na mahusiano ya moja kwa moja na mchezaji huyo. Siku zote amekuwa akiniambia kuwa endapo tutakuwa na makubaliano mazuri ya kikazi basi yeye hana shida na suala la kuongeza mkataba wake na atakuwa tayari kufanya hivyo.”

Depay, mwenye umri wa miaka 26, amefunga jumla ya mabao 43 na kusaidia mengine yapatayo 33 katika mechi 102 za Ligue 1 kwa klabu ya soka ya Olympique Lyonnais na amefunga mara sita na kusaidia upatikanaji wa mabao manne kwenye mechi 13 za michuano ya UEFA Champions League kwa klabu hiyo ya Ufaransa.