Marc-André Ter Stegen Awachimba Biti Wapinzani

Kipa wa Ujerumani na Barcelona, Marc-André Ter Stegen amewaonya Napoli kwamba Barcelona ‘mara chache mno’ wamekuwa katika kiwango kizuri kuliko walivyo sasa: “Tunataka kutumia fursa yetu vilivyo.”

Ligi ya Uhispania itaanza tena baada ya siku 10 zijazo, wakati Barcelona wakijiandaa kukutana na Mallorca mnamo Juni 13 na kipa huyu wa Barca ana matumaini timu yake itafanya vyema ligi ikiendelea.

Staa huyu wa Ujerumani amekuwa mmoja wa mashujaa wa Camp Nou kwa msimu wa 2019-20 lakini bado amehusishwa sana na mpango wa kuondoka klabuni hapo. Lakini kwa upande wake anasisitiza kuwa hataondoka msimu huu wa joto.

“Haiwezekani kwamba niondoke Barcelona msimu huu wa joto. Tayari kumekuwa na mkutano wa kwanza kati ya wakala wangu na kilabu, kisha ikaibuka hali hii ya coronavirus na hatukupata wakati wa kuzungumza juu ya mkataba.

“Wakati ambao watu wengi wana wasiwasi juu ya maisha yao, tumeamua kuahirisha. Ninajisikia vizuri hapa Barcelona, ​​pia kwa sababu familia yangu inajisikia vizuri hapa.”

Ter Stegen basi aliwaonya wapinzani wao, pamoja na Napoli, kwamba Barcelona wako tayari kutumia kwa hali na mali fursa yao katika Ligi ya Mabingwa kwa msimu huu.

“Kimsingi, mara chache tumekuwa katika kiwango hiki, lakini Real Madrid hawatatupa chochote [kwenye Ligi]. “Kuhusiana na Ligi ya Mabingwa, tuna nafasi ya kupita na tunataka kutumia fursa hiyo.

“Kwa kweli mpira mpya utakuwa tofauti. Mechi bila mashabiki sio nzuri kihivyo, lakini mpira utasonga tena na ndivyo tunataka.”

-Marc-André Ter Stegen