Mustafi: Tukisaidiana Tutatatua Matatizo Mengi

Mchezaji Mustafi anaamini kuwa ni muhimu sana kuwa na mtazamo chanya juu ya kila kitu maishani.

Ikiwa ni sehemu ya program ya Mental Heath Awareness Week, mlinzi wa klabu ya Washika Mitutu wa London, Arsenal, Shkodran Mustafi aliongelea suala la utu wema na kuwa na mtazamo mwema juu ya kila jambo maishani.

Mlinzi huyo wa Arsenal alijadili juu ya kuepukana na mawazo mabaya maishani na umuhimu wa kutendeana mema wakati wa janga la Corona.

Program ya Mental Health Awareness Week ilifanyika mnamo tarehe 18 hadi tarehe 24 ya mwezi Mei ambapo wachezaji kadhaa wa klabu za soka za Premier League walielezea afya zao za akili.

Kuendelea kuwa na maono sahihi wakati wa mlipuko wa ugonjwa wa Corona ilikuwa ni jambo gumu sana lakini mwanakabumbu wa Arsenal anaamini kwamba unapoamua kuwa na maono chanya juu ya masuala mbalimbali iansaidia sana kukuokoa na matatizo ambayo huenda yangekupata.

“Madaktari wote wanafanya kazi nzuri sana na sisi kama taifa tunajitahidi kupambana na hali hii ila kitu cha muhimu ni sisi kuwa na maono chanya juu ya kila kitu,” alisema hayo Mustafi.

“Endapo tungeweza kuwa na mtazamo chanya juu ya mambo mbalimbali basi tungepata urahisi sana wa kutatua matatizo yetu ya kila siku na kuwa katika hali nzuri sana maishani hasa kifikra na kiafya. Ila ukishikilia kuangalia tu masuala mabaya na mtazamo mbaya utabakia na huzuni muda wote na kuathiri afya zetu.”

Dhamira ya mwaka huu kwenye Mental Health Awareness Week ni kusisitiza upendo na utu wema miongoni mwetu na mwezi uliopita Mustafi alichangia vyakula kwa watu wapatao 16,000 wakati wa kusherehekea siku ya kuzaliwa huko Islington.

“Kwa kawaida siku ya kukumbuka kuzaliwa unapewa zawadi na unakuwa unazungumziwa wewe siku nzma lakini kwa sababu sikuweza kuwa na familia yangu na marafiki zangu na kila mtu awaye yote, nikawaza na kujiambia kuwa ni muda muafaka wa mimi kutoa badala ya kupokea,” alisema.

“Hasa wakati huu ambapo hali ni mbaya na tunapitia magumu maishani, tunatakiwa kujitahidi kusaidiana kwa hali na mali, kufanya yale tunayotaka kufanyiwa na tutaishinda vita hii pamoja.”