Samatta na Wenziye Kuanza Kampeni…

Baada ya majadiliano ya muda mrefu juu ya ni lini ligi ya EPL irejee, ligi ambayo mwanzo ilipangwa kurejea Juni 12, sasa ni rasmi kuwa ligi hiyo itarejea mnamo Juni 17 baada ya vilabu vyote kukubaliana hivyo.

Ligi hiyo itaanza kwa Aston Villa ya Samatta kuwakaribisha wageni Sheffield United, huku Manchester City wakiwaalika Arsenal pale Etihad Stadium. Mechi hizi mbili ni muendelezo wa kukamilisha viporo ili timu zote katika ligi kuu ziwe zimekwishacheza michezo 29 kisha ligi hiyo itaendelea tena June 19 na 21 katika raundi yake ya 30.

Timu ya Aston Villa anayochezea nyota wa kimataifa wa Tanzania, Mbwana Ally Samatta itarudi uwanjani kuendeleza harakati zake za kujinusuru kutoka katika wimbi la kushuka daraja wakiwa na kumbukumbu mbaya ya kuraluliwa vibaya na Leicester City katika kipigo cha aibu cha 4 kwa sifuri katika mchezo wao wa mwisho, na ikumbukwe kuwa huo ndiyo ulikua mchezo wa mwisho wa ligi ya Primia kabla haijasimamishwa kwa ajili ya janga la Corona.

Aston Villa walio katika nafasi ya 19 ya msimamo wa ligi yenye jumla timu 20 watakua na kibarua kizito mbele ya Sheffield United ambao wao wapo katika nafasi ya 7 huku wakiwa wamejikusanyia jumla ya alama 43. Hakuna namna nyingine kwa Samatta na wenzie kujinusuru wasishuke daraja ila tu kwa kushinda mchezo huo na mingine itakayowakabili.

Aston Villa wenye jumla ya alama 25 katika michezo 19 waliyocheza mpaka sasa, wamebakiwa na michezo 10 mkononi ambayo wanatakiwa kufanya wawezavyo wabaki katika ligi kuu. Kitu pekee kinachoonekana kuwa kinaweza kuwarahisishia Aston Villa kubaki katika ligi hiyo ni kujikusanyia alama zaidi ya 15 ili wawe na jumla ya alama 40 kujihakikishia nafasi yao katika EPL.

Ni Kwanini Alama 40 Zinaweza Kuwa Salama Kwao?

Katika misimu 23 ya ligi kuu ya Uingereza maarufu kama ‘EPL’ kuna jumla ya timu 20 zilizowahi kushushwa daraja, katika hizo ni timu tatu tu ambazo zilishuka zikiwa na alama kuanzia 40.

Kwa zaidi ya miaka 15 sasa hakuna timu iliyoshuka daraja kutoka Primia ikiwa na alama kuanzia 40. Kumbukumbu zinasema kuwa timu ya mwisho kufanya hivyo ni West Ham United ambao walishuka daraja msimu wa 2002/03 wakiwa na alama 42.

Kwa mazingira hayo, ni wazi kuwa alama 40 ndiyo salama kwa Samatta na wenzie ili waweze kusalia ndani ya ligi kuu, Vinginevyo safari yao ni ya mashaka.