Benfica Wapigwa Mawe na Mashabiki

Wachezaji wawili wa mabingwa wa ligi kuu ya Ureno, klabu ya Benfica wameumia baada ya basi la timu hiyo kushambuliwa kwa kupigwa mawe na mashabiki wa timu hiyo.

Tukio hilo linalolaaniwa na wadau mbalimbali wa soka dunia kote, limetokea siku ya alhamisi ikiwa ni baada ya Benfica kucheza mechi yao ya kwanza kabisa kutokea kwenye likizo ya dharula ya ugonjwa wa Corona.

Mashabiki hao walifanya tukio hilo kama ishara ya kuonesha hasira zao baada ya Benfica kutoa suluhu ya bila kufungana na timu inayoshika nafasi za chini kabisa katika msimamo wa ligi hiyo, Tondela.

Matokeo hayo yanawafanya Benfica wabaki nafasi ya pili na alama zao 60 ambazo ni sawa na zile za Porto wanaoongoza msimamo huo, lakini kwa tofauti ya mabao ya kufunga na kufungwa.

Pamoja na kwamba ligi hiyo inaendelea bila ya uwepo wa mashabiki kutokana na janga la Corona, mashabiki hao wa Benfica walizingira uwanja wa timu hiyo ili kuisapoti timu yao hiyo.

Mashabiki wa timu hiyo walilivamia basi hilo kulipiga mawe hali iliyopelekea kuvunja vioo vya basi hilo na kujeruhi wachezaji wawili wa timu hiyo, Julian Weigl na Andrija Zivkovic ambao wamewahishwa hospitali ya Hospital da Luz iliyopo ndani ya jiji la Lisbon.