Msimamo wa UEFA Unakinzana na Ule wa FIFA

Mwenyekiti wa kamati ya matibabu wa UEFA anasema michuano inaweza kuanza tena licha ya mwenzake wa FIFA kusema haipaswi kuanza kabla ya Septemba. Mwenyekiti wa kitengo cha Matibabu cha Shirikisho la Soka barani Ulaya (UEFA) Tim Meyer amesema ni jambo linalowezekana kupanga mpango wa kuanza tena ligi za soka barani humo ili kumaliza sehemu ya msimu iliyobakia.

Tim Meyer

Meyer ameeleza kwamba hatua zilizochukuliwa na zinazoendelea kuchukuliwa kwa ajili ya kupambana na Corona soka linaweza tena kuanza kuchezwa. Kauli hiyo ya mwenyekiti wa matibabu wa UEFA inakinzana na ile kauli ya mwenyekiti wa kamati ya matibabu ya FIFA Michel D’Hooge aliyotoa siku ya Jumanne akisema kuwa mpira wa miguu haupaswi kuchezwa kwa sasa angalau hadi mwishoni mwa mwezi wa nane au mwanzoni mwa mwezi wa tisa ili kuzuia kuenea kwa maambukizi mapya ya Virusi vya Corona.

Wakati huohuo mjumbe wa kamati kuu ya UEFA Lars-Christer Olsson ambaye pia ni rahisi wa Ligi ya Ulaya amesema janga la virusi vya Corona litaharibu kalenda ya soka la Kimataifa na itaathirika kwa zaidi ya miaka miwili mpaka mitatu. Lars Olsson amesema kuwa kesi ya kusubiri na kutathimini janga la Corona ni pamoja na kuangalia michuano ijayo ya Kombe la Dunia ambayo itafanyika nchini Qatar 2022.

Olsonn amesisitiza pia lazima ufanyike mpango mbadala wa kurekebisha madirisha ya Kimataifa ya majira ya kiangazi na kuangalia uwezekano wa kurekebisha ratiba ya kufuzu kwa michuano ijayo ya Kombe la Ulaya maarufu kama Euro.