Rasmi Roberto Martinez Asaini Mkataba Mpya

Shirikisho la soka la Belgium (KBVB) limetangaza kuwa Roberto Martinez amesaini mkataba kusalia Belgium kama kocha mkuu hadi 2022.

Martinez aliteuliwa na Belgium mwaka 2016, mkataba wake mpya unampa nafasi ya kuendelea kusalia klabuni hapo hadi mwaka wa Kombe la Dunia la Quatar 2022.

Kocha huyu Mhispania aliwaongoza kikosi cha Belgium maarufu kama “Golden Generation”, huku uswahilini tunaweza kusema “Kizazi cha Dhahabu” hadi kufikia nusu fainali za Kombe la Dunia Urusi mwaka 2018 ambako Ufaransa waliamua kuwabania riziki kwa kuwapa kichapo kabla ya kuwalaza Uingereza na kuchukua ubingwa wa dunia.

Mkataba wake wa sasa ulikuwa unaisha baada ya michuani ya Euro 2020 ambayo imesogezwa mbele kwa mwaka mmoja zaidi kwa sababu ya janga la corona.

Belgium ambao kwa sasa wapo kwenye kilele cha FIFA kwa timu bora zaidi, walikuwa moja ya timu zilizotarajiwa kuondoka na ubingwa wa dunia baada ya kufanya vyema katika hatua za awali toka kufuzu mpaka walipoingia nusu fainali.

Tangazo la Belgium limenogeshwa na Hazard!

Tangazo limeambatana na video fupi ya kapten wa Belgium na nyota wa Real Madrid, Eden Hazard akicheza gemu ya video maarufu ya FIFA huku akivunga kama anapokea simu ya nchezaji mwenzake Romelu Lukaku.

Kwenye video fupi Hazard anasema:

“Kocha amesaini! Kocha amesaini, ole ole ole. Mambo Romelu, umeona kocha kasaini? ndiyoo si ni taarifa njema hizi! Haya kwaheri”

Belgium na Martinez wanatarajia kuongea na vyombo vya habari Jumatano hii ili kuzungumzia suaola la mkataba wake mpya.