Tenisi Kwenye Damu, Serena Anatamani Kurudi

Staa wa tenisi wa Marekani, Serena Williams anasema kwamba kwa sasa yupo tayari kucheza mchezo halisi wa tenisi baada ya kuwekwa karantini kwa muda sasa.

“Ninatamani sana kurudi uwanjani kucheza mchezo niupendao,” alisema mshindi huyo mara 23 wa Grand Slam wakati akiwasiliana na dada yake, Venus wakati wa mawasiliano yao walipokuwa wakifanya mazoezi kwa njia ya mtandao wa Instagram siku ya Jumanne.

“Ninaiweza sana. Ninapenda sana kuifanya!”

Tenisi na michezo mingine yote imeahirishwa mpaka ifikapo katikati ya mwezi Julai kutokana na janga la COVID-19 huku michuano ya French Open nayo ikiahirishwa mpaka majira yajayo wakati pia michuano ya Wimbledon nayo ikifutwa kwa mara ya kwanza tangu itokee vita ya dunia ya pili.

Serena anasema kuwa anaona likizo hii kuwa ni jinamizi la lazima.

“Naona kama mwili wangu ulihitaji kitu hiki kwa hakika ingawa sikuitaka kabisa,” alisema mchezaji huyo mwenye umri wa miaka 38 ambaye mara ya mwisho alishinda taji la Grand Slam mwaka 2017 kwenye michuano ya tenisi ya Australian Open. “Na kwa sasa ninajisikia vizuri kabisa. Ninajiona nimepumzisha mwili kiasi cha kutosha, nina afya bora sasa. Kwa sasa ninaweza kwenda nje kucheza michezo halisi kabisa.”

Dada yake mkubwa, Venus, mshindi mara saba wa tuzo ya Grand Slam, alianza kuposti mazoezi yake kupitia mtandao wa Instagram wiki nane zilizopita ambapo akamualika mwenzake wiki hii, dada yake huyo wanapatana sana na akamkaribisha katika mazoezi aina ya yoga ikiwa ni sehemu ya kusogeza muda ili kungoja kurudi kwa michuano yao.

Serena alisema kwamba mazoezi, ambayo yanawachukua muda wa saa moja na nusu, ilikuwa kama changamsha mwili kwake, ingawa hawakuwa vyema sana kimwili wakati huo.

“Usijiumize mwenyewe wakati ukifanya hilo.” Alifunguka wakati gulani na akamshauri mwenzake. “Endapo ukiwa na magoti mabaya kama yangu hakikisha unatumia pad kucheza.”