Watakaonunuliwa Endapo Newcastle Ikinunuliwa!

Ikiwa lile sekeseke la klabu ya ligi kuu ya Uingereza, Newcastle United kunuliwa na mabilionea wa Saudi Arabia linakaribia kufikia mwisho,  ni suala la muda tu kabla Newcastle hawajawa kama Chelsea ya Roman Abrahmovich na Manchester City ya Sheikh Mansour.

Bilionea wa Newcastle, Ashley yu mbioni kuachia klabu hiyo kwa mfuko wa Uwekezaji wa Saudi Arabia (PIF) ambao unaongozwa na mwana mfalme Prince Mohamed Bin Salman kwa bei ya paundi milioni 300.

Ikiwa dili hilo litafanikiwa basi tujiandae kuishuhudia Newcastle yenye misuli ya kutosha kushindana katika mbio za ubingwa wa ligi kuu hata kushiriki mashindano makubwa ya Ulaya hasa kutokana na uwekezaji utakaofanywa na bilionea huyo wa Saudia. Kabla hata dili lenyewe halijakamilika kumekua na tetesi za wamiliki hao kutaka kumleta klabuni hapo aliyekua kocha wa Tottenham Mauricio Pochettino. Nyota wa zamani wa Newcastle Mick Martin alinukuliwa na gazeti maarufu la michezo la Uingereza, the Express akimzungumzia kocha huyo, “Pochettino anawajua wachezaji wazuri, anaijua America ya Kusini na Ulaya pia. Ni kocha bora kwa sasa.”

Kama hiyo haitoshi, ili kuimarisha kikosi hicho cha Newcastle United na kukifanya kuwa bora wamiliki hao wameonesha kuhusishwa na wachezaji wafuatao:

Phillipe Coutinho. Watakaokuwa mabosi wapya wa Newcastle wanatajwa kuhusishwa na nyota huyo wa Barcelona anayekipiga kwa mkopo katika timu ya Bayern Munich ya Ujerumani. Kama dili hilo la ununuzi wa timu ya Newcastle United likitimia basi itawalazimu kutoa kitita cha pauni milioni 70 au zaidi ili kupata saini ya nyota huyo.

Nafasi ya mchezaji huyo mwenye umri wa miaka 27 inaonekana kuwa yenye mashaka hivyo anaona ni bora aende sehemu nyingine kutafuta chabgamoto mpya, hakubaliani kuwa mchezaji wa ‘mkopo’. Timu nyingine ambayo itachuana na Newcastle United kwa mchezaji ni Chelsea ya Uingereza.

Antoine Griezmann ni mchezaji mwingine ambaye anatajwa kuwa anaweza kutua St. James’ Park kama mambo yakienda sawa. Jarida la michezo la Sport Mediaset limeripoti kuwa wamiliki wapya wa Newcastle wanavutiwa na nyota huyo wa Barcelona na kuhusu kumnunua ni suala la muda tu kwani pesa kwao sio tatizo.

Moussa Dembele wa Lyon ya Ufaransa ni mchezaji mwingine matata anaetajwa na kuangaliwa sana na mabosi hao. Klabu hiyo ya Newcastle imekua ikihaha kuhitaji huduma ya nyota huyo kila mara na mara zote hizo dili hilo limekua likikwama kutokana na Lyon kuhitaji pesa nyingi ili wamuachie nyota huyo. Kwa ujio wa wamiliki wapya ni wazi kuwa dili hilo linaelekea kutimia kwani wao sio mabahili kama bilionea Ashley ambaye ndiyo mmiliki wa sasa wa The Magpies.

Kylian Mbappe ni mchezaji anaetajwa sana na mashabiki wa Newcastle United lakini sio na viongozi wala wamiliki hao wapya. Mashabiki hao wa The Magpies wanaamini pesa ndiyo kila kitu, kwamba pesa ikiwekwa mezani tu unaweza kufanya kila kitu katika soka. Umtoe Mbappe PSG na kumleta Newcastle, bila shaka wanaamini hata Messi wa Barcelona wataweza kumchukua dili hilo likitimia.

Kwa hili la Mbappe sioni kama kuna uwezekano mkubwa sana wa kutimia kwani kwa umri wa Mbappe ni umri ambao hahitaji kwenda katika timu ambayo ndiyo kwanza inajijenga, anahitaji timu ambayo tayari imeishajijenga ili apate mafanikio katika soka akiwa bado mdogo. Ila wanasema kuwa katika mchezo wa soka lolote linaweza kutokea, tuuachie muda uamue.

John McGinn. Sio tu wachezaji wa nje ya ligi ya EPL tu wanaotajwa, kuna wachezaji kadhaa wa vilabu vya ligi kuu ambao wanatajwa kuhusishwa na Newcastle iwapo dili hilo litakamilika. The Magpies watatakiwa kutoa kiasi cha £20 ili kupata saini ya nyota huyo wa Aston Villa, lakini kikwazo kingine watakachokumbana nacho katika dili hilo ni Manchester United ambao nao wameonesha kuvutiwa na mchezaji huyo.

Dwight McNeil. Moja kati ya timu Zilizotoa ushindani ligi kuu ya Uingereza ni Burnley ambao hawakupewa nafasi kabisa mwanzoni mwa msimu, lakini walichokifanya mpaka sasa sio cha kupotezewa. Burnley  mpaka ligi inasimama walikua nafasi ya kumi katika msimamo wa EPL, mafanikio yao yamechagizwa na uwekezaji uliofanywa na mmiliki wa klabu hiyo tajiri Mike Garlick na juhudi binafsi za wachezaji.

Ukitaja mafanikio ya klabu ya Burnley huwezi kuacha kutaja jina la winga machachari wa timu hiyo Dwight McNeil. Mchezaji huyo ni lulu ya timu hiyo kutokana na kiwango chake kinachokua siku baada ya siku. Kama Newcastle wakifanikiwa kupata saini ya nyota huyu watakua wamefanya usajili mkubwa na muhimu kwa maendeleo ya timu yao.

Tuwaombee mabilionea hao wafanikiwe katika dili lao la kuinunua klabu hiyo ili hizo hela zao za mafuta zipate pa kutumika, mana mara nyingine kuwa na pesa na huna namna ya kuzitumia ni sawa tu na hauna.