Novak Djokovic Aipinga Chanjo ya COVID-19

Mkali wa mchezo wa tenisi duniani, Novak Djokovic amesema kwamba yeye atakwenda kinyume na suala la wao kulazimishwa kupatiwa chanjo ya ugonjwa wa Corona ambao umeibuka ili kushiriki michuano yao!

“Binafsi sikubaliani na suala la chanjo. Sipendi mtu anilazimishe mimi kufanya jambo hilo ili niweze kusafiri kuelekea kwenye michuano ya tenisi kwa wachezaji wanaohusika.” Alisema hayo bingwa huyo wa tenisi duniani siku ya Jumapili.

Staa huyo wa Serbia alikuwa akizungumza hayo kutokea nchini Hispania, ambako amefungiwa kutoka nje yeye pamoja na familia yake, katika mkutano wa video alioufanya kupitia Facebook kwa ajili ya Orthodox Easter.

“Sisi wachezaji tutatakiwa kusafiri. Ninadhani hiyo ni changamoto namba moja,” alinena mchezaji huyo mwenye umri wa miaka 32.

“Endapo chanjo italazimishwa unadhani ni nini kitatokea? Nitatakiwa kuchukua maamuzi magumu,” alisema maamuzi hayo yatakuwa ni juu ya kukubali ama kukataa chanjo hiyo.

“Haya ni mawazo yangu kwa wakati huu. Sijui kama nitayabadilisha tena siku zijazo!”

Kwa sasa hakuna chanjo ya kutukinga na ugonjwa huo wa Corona ambao mpaka leo umeua takribani zaidi ya watu 165,000 duniani kote, ingawa maabara mbalimbali duniani zinajaribu kuendelea kutafuta dawa ya ugonjwa huu.

Kama ambavyo imekuwa na kwa wengine wote wanaojihusisha na michezo duniani, mapema mwezi Machi michezo ya tenisi ilisimamishwa kwa muda kutokana na janga hili, kwa sasa inatarajiwa kuwa Michuano ya Tenisi ya ATP pamoja na ile ya WTA Tours itaendelea kuahirishwa mpaka ifikapo katikati ya mwezi Julai kwa makadirio ya siku za karibuni ambapo pia Wimbledon imefutwa kwa mara ya kwanza tangu kipindi cha Vita ya Pili ya Dunia itokee.

Djokovic anakadiria kuwa michuano hiyo ya kidunia haitoanza upya kabla ya mwezi Septemba na Oktoba mwaka huu.

“Msimu utaanza rasmi wakati kila mtu atakapokuwa na uhakika wa asilimia 100 kwamba watu wanaweza kurudi tena kutazama michezo yote, kwamba hakutakuwa na hatari ya maambukizi tena, kwamba watu watakuwa wakiweza kujikinga dhidi ya virusi hivyo na hii yote itachukua muda sana.”

Alisema kwamba inawezekana kabisa michuano ikafanyikia sehemu moja ama katika eneo moja litakalopendekezwa.