Muhammad Alli na Joe Frazier mwaka 1975 Lazima Bingwa Apatikane

Maumivu yaliyoje kukosa nafasi ya kutazama pambano la mwisho kati ya Mohammed Alli na Joe Frazier. Lilikuwa Pambano la kusimamisha dunia, pambano la kuzima jua na pambano la kutuliza bahari.

Muhammad Alli na Joe Frazier walikuwa wanakutana kwa mara ya tatu. Frazier alishinda pambano la kwanza, Alli alishinda la pili, hili la tatu lilikuwa la kumaliza ubishi wa nani mbabe. Mara hii likifanyika mji wa Manilla, Ufilipino.

Zilikuwa zimebaki dakika 15 ifike saa tano asubuhi kengele ya kuashiria pambano lilianze ilipopigwa ndani ya Araneta Queizone. Muhammad Alli kama kawaida yake alianza vurugu zake mapema sana, akimtupia Frazier matusi kabla hata hajaanza kurusha ngumi. Joe alimchekea tu na kumwambia “Huna kitu leo”.

Alli alishinda round ya kwanza na ya pili. Akaanza kwa kasi round ya tatu akiendelea kumtukana Joe na kumuambia maneno ya kejeli kama “nipige kwa nguvu nyani wewe.. tatizo ngumi zako laini kama za mke wangu. nakuambia ntakuua leo”. Ila ni katika round ya tatu Joe alifanikiwa kuingiza ngumi ya kwanza kwa Alli.

Frazier aliendelea kumuwashia moto Alli katika round tatu zilizofuata. Alli akarejea kutawala round ya saba na ya nane. Katika round ya tisa Alli alikimbilia pembeni na kumuambia ‘corner man’ wake “ndugu yangu nakufa, kweli tena nakufa kabla sijaandika urithi”. Upande mwingine wa ulingo Joe Frazier alikuwa anaugulia maumivu ya uso uliovimba kiasi cha kumziba jicho lake la kushoto.

‘Corner man’ wa Frazier alitupa taulo ulingoni katika round ya 14, japo bondia wake alishinikiza anataka kuendelea. Baada ya pambano Joe Frazier alisema “kweli yule jamaa ni shujaa, nimempiga ngumi zinazoweza kudondosha ukuta, ngumi zinazoweza kumdondosha farasi asinyanyuke tena”.
Alli yeye alisema, “sijawahi kusogelea kifo kama leo, Frazier alikubali yaishe sekunde kadhaa kabla yangu”.