Zlatan Ibrahimovic Anaamini Yeye ni Bora Kuliko Ronaldo na Messi

Ukweli haujui uongo ila uongo siku zote unaujua ukweli, ili uwe mkweli unahitaji tu kuwa mkweli, lakini ili uwe muongo lazima uishi katika kivuli cha ukweli siku zote. Ibrahimovic amechagua kuishi katika kivuli cha ukweli, moyo wake uliojaa uongo umeulevya mpaka ubongo wake, kikombe cha mahaba juu ya kipaji chake kimemfanya kuwa mtumwa wa nafsi yake.

Nafsi yake haishi tena ile kweli anayopaswa kuishi, inamfanya kujiona ndiye mchezaji bora kuwahi kutokea duniani, ameamua kuwa kinyume na dunia nzima ya soka. Kibaya anaona dunia ndiyo inamkosea heshima sana, heshima wanazopewa Lionel messi na Cristiano yeye alistahili kupewa zaidi yao, hatazami makubwa waliyofanya.

Akiwa Barcelona Zlatan Ibrahimovic aliwaita Messi, Iniesta na Xavi kuwa ni watoto wa shule wanaopendelewa na mwalimu wao, kipindi hicho akiwa ni Pep Guardiola, hakuona sababu ya wao kuonekana bora wakati yeye akiwepo.

Kwa Zlatan anaanza Zlatan ndo wengine wanafuata, Pep Guardiola hakulijua hili mpaka alipoambiwa huwezi kumuweka nje mungu wa mpira kwa ajili tu ya genius messi. Akaondoka zake Nou Camp, moyoni akiamini Lionel Messi hakustahili kuonekana bora zaidi yake ila akilini akauficha uwezo wa kufunga wa Lionel Messi.

Kwa Cristiano Ronaldo, Zlatan Ibrahimovic atakwambia Ronaldo anayemjua yeye vizuri ni yule Ronaldo de lima wa Brazil, hamfahamu mwingine, inawezekana ikawa sahihi kwake. Lakini uongo siku zote unatafuta njia zake kuficha ukweli, atakwambia tena huyu wa sasa ni zao la mazoezi tu kipaji cha mpira hana, kumbe anamjua Cristiano Ronaldo ni ngumu kuuficha ukweli.

Mazoezi ya mpira ni chakula cha kila mchezaji, mbona wanazidiana ubora sasa, anatuthibitishia maneno ya kuwa uongo una njia fupi. Kwa Zlatan Ibrahimovic pia anamuona Pele kama mtu aliyebebwa na nyakati, kwake hana maajabu yoyote yale, amenda mbali na kusema kama yeye angezaliwa enzi za kina Pele zilizokua hazina VAR angeweza kufunga zaidi ya goli 3000.