James Kotei na Alama Kubwa Aliyoiacha Msimbazi

Ni ngumu kutazama mwisho wa jambo kuliko mwanzo wa jambo, mwisho wa jambo siku zote hubeba kumbukumbu zisizofutika baina ya pande mbili, haswa zikiwa ni kumbukumbu zilizojaa upendo unaoishi moyoni.

Kumbukumbu kumhusu kiungo James Kotei bado zinaishi ndani ya wanasimba, zimegoma kufutika kirahisi haswa wakitazama mwisho wao ulivyokuwa mzuri. Mwisho wa James Kotei ndani ya Simba ulijaa machozi yenye furaha ndani yake, hakuna aliyetamani yaishe, kila shabiki alitamani kufunga mlango wa Kotei kuondoka Tanzania.

Simba yenye miguu ya James Kotei ilikua salama salimini, alijua namna kiungo wa kati anatakiwa kuwa, pindi timu ikiwa haina mpira, ubongo wake ulisoma movement za wapinzani na miguu yake ikapokea maelekezo sahihi ya kupokonya mpira vyema.

Sura ya tabasamu ya Jonas Mkude pale katikati ya uwanja sababu yake kubwa ilikua katika miguu ya James Kotei, maana alimhakikishia pasi pindi atapohitaji kuzipeleka mbele na muhimu zaidi usalama wa timu pindi atapopanda juu kupiga mashuti. Mwalimu Patrick Aussems alikua na uhakika na kile alichokuwa anakifanya sana James Kotei hadi akafikia kuwaruhusu wakina Emmanuel Okwi kuwa free muda wote kuchezea mpira, ni miguu ya Kotei iliyofanyika kafara ili tu timu icheze vyema.

Viungo wa timu pinzani walimchukia pale alipokuwa anakaba, lakini walimpenda pale walipokuwa wanampiga rafu, alikua ananyanyuka taratibu anafurahi, ilikua ni nadra sana kuiona sura ya Kotei ikiwa na hasira.

Akitoka nje ya uwanja anavaa jezi ya taifa stars anapiga selfie, tunamuona ni mmoja wetu, alijua kutufurahisha na tukafurahi kumuona akifurahi. Katikati ya furaha ghalfa James Kotei akatangaza kujiunga na Kaizer Chief, iliwastua wengi sana, ni ngumu sana kupokea mkono wa kwaheri katikati ya furaha ni ngumu sana.

Ingawa machozi yanawahi kukauka lakini macho siku zote hubaki kuwa na majonzi bado majonzi ya kumbukumbu ya James Kotei yanaishi katikati ya wanasimba. Ukitaja jina lake picha inayokuja ni kiungo aliyejua nini Simba inataka katikati ya uwanja, atabakia kukumbukwa kwa sababu kwa heri yake alitoa katika ya upendo na furaha, atabaki James Kotei atabaki James mwana wa Kotei.