C.E.O Simba Aionya Yanga Ngao ya Jamii

BAADA ya kuibuka na ushindi wa kishindo wa mabao 2-0 dhidi ya ST. George ya Ethiopia katika mchezo wa kilele cha siku ya Simba ‘Simba Day’, Ofisa Mtendaji Mkuu wa Simba, Barbara Gonzalez ametamba kuwa wanajivunia ubora ulioonyeshwa na kikosi chao kwenye Simba Day na sasa nguvu zote wamewekeza kuhakikisha wanashinda mchezo wa Ngao ya Jamii dhidi ya Yanga utakaopigwa Jumamosi.

Simba juzi Jumatatu kwenye Uwanja wa Benjamin Mkapa walitangaza rasmi majembe yao mapya na benchi lote la ufundi kuelekea msimu ujao wa 2022/23 huku pia wakitoa burudani kwa kuibuka na ushindi wa mabao 2-0 dhidi ya ST. George ya Ethiopia.

Jumamosi hii Simba wanatarajiwa kuvaana na Yanga katika mchezo wa ufunguzi wa ligi maarufu mchezo wa Ngao ya Jamii, unaotarajiwa kupigwa kwenye Uwanja wa Benjamin Mkapa, Dar es Salaam.

Barbara alisema: “Kwa niaba ya uongozi tunashukuru kwa sapoti kubwa ambayo mashabiki wetu wamekuwa wakituonyesha siku zote, lakini hasa katika tamasha letu la Simba Day.

“Najivunia ubora ulioonyeshwa na kikosi chetu, nadhani kila mmoja ameona ubora mkubwa wa watu tuliowasajili, hii ina maana kuwa tumejipanga kufanya makubwa msimu ujao, kwa sasa tumesahau kuhusiana na kile kilichotokea Jumatatu na nguvu yetu kubwa ni kuhakikisha tunashinda mchezo wa Jumamosi dhidi ya Yanga.”